ننګرهار؛ د ترافیکي پېښې د قربانیانو له کورنیو سره ۹۴ زره او ۵۰۰ افغانۍ نغدي مرسته وشوه
پنجشنبه، ۲۹ صفر ۱۴۴۸
د افغاني سرې میاشتې له لوري په ننګرهار ولایت کې د ترافیکي پېښې د ۹ قربانیانو له کورنیو سره ۹۴ زره او ۵۰۰ افغانۍ نغدي مرسته وشوه.
یاده مرسته د ملي ټولنو نړیوال فدراسیون په ملاتړ چمتو شوې وه، چې له مخې یې د هر قرباني کورنۍ ته ۱۰ زره او ۵۰۰ افغانۍ ورکړل شوې.
یادو کسانو څه موده وړاندې د ننګرهار ولایت د پچیر اګام ولسوالۍ د مرغې کنډو په سیمه کې د یوه ډاټسن موټر د چپه کېدو له امله په رامنځته شوې ترافیکي پېښه کې خپل ژوند له لاسه ورکړی و.
دغه نغدي مرسته د قربانیانو د کورنیو د لاسنیوي او د هغوی د بېړنیو اړتیاوو د یوې برخې د پوره کولو په موخه ترسره شوه.
افغاني سره میاشت د بېلابېلو پېښو له امله د زیانمنو کورنیو د وضعیت ارزونې او شته امکاناتو ته په کتو، د هغوی د بېړنیو اړتیاوو د پوره کولو لپاره بشري مرستې وېشي.
