پکتیا؛ د ۳.۲ میلیونه افغانیو په ارزښت د اوبو کانال پروژه ګټې اخیستنې ته وسپارل شوه
یکشنبه، ۱۴ ربیع الآخر ۱۴۴۸
د افغاني سرې میاشتې له لوري د پکتیا ولایت د ځاځي اریوب ولسوالۍ په ګل غونډۍ کلي کې د ۳.۲ میلیونه افغانیو په ارزښت د اوبو کانال پروژه بشپړه او ګټې اخیستنې ته وسپارل شوه.
د پروژې په ترڅ کې ۳۰۳ متره د اوبو کانال او ۱۲۰ متره استنادي دېوال جوړ شوي او د ۲۲۰۰ مترو کانال د پاکولو چارې هم د یوې میاشتې په موده کې ترسره شوې دي.
د پروژې د پلي کېدو پر مهال ۸۴ مسلکي او غیر مسلکي کاریګر په کار وګومارل شول، چې هر مسلکي کاریګر ته ۲۴ زره او هر غیر مسلکي کاریګر ته ۱۵ زره افغانۍ د کار په بدل کې ورکړل شوې.
دغه پروژه د سره صلیب نړیوالې کمېټې په مالي ملاتړ پلې شوه او موخه یې د ځاځي اریوب ولسوالۍ د ګل غونډۍ، متاڼي او کوټکي کلیو د کرنیزو ځمکو خړوبول دي، چې شاوخوا ۴۰۰۰ جریبه ځمکه به د دې پروژې له اوبو څخه ګټه واخلي.
افغاني سره میاشت د اوبو لارو د جوړولو او بیارغونې له لارې د کرنیزو ځمکو لپاره د اوبو لګولو اسانتیاوې رامنځته کوي او خلکو ته کاري فرصتونه برابروي.
