د افغاني سرې میاشتې مشرتابه د مرکزي ریاستونو د مسئولینو سره مشورتي ناسته وکړه
پنجشنبه، ۱۶ ربیع الآخر ۱۴۴۷
د افغاني سرې میاشتې د عمومي رئیس ښاغلي شیخ الحدیث شهاب الدین دلاور، د نوموړي مرستیال ښاغلي حافظ عزیز الرحمن، د سکرتر جنرال عملياتي مرستیال ښاغلي مولوي روح الله عبدالسلام او د مرکزي ریاستونو د مسئولینو ترمنځ په مرکزي ریاستونو، زونونو او ولایتي نماینده ګیو کې د چارو د لا ښه والي او شته ستونزو د حل په موخه مشورتي ناسته وشوه.
ناسته کې په کابل، هرات، نورستان، ننګرهار او کندهار ولایتونو کې د افغاني سرې میاشتې پر ملکیتونو د پانګونې، ځانګړې اونۍ ته د چمتووالي، زونونو کې د رواني ناروغانو د درملنې لپاره د متخصصو روغتیاپالانو د ګمارنې، د اتصالاتو مخابراتي شرکت او افغاني سرې میاشتې تر منځ د بشري مرستو د جلب لپاره د ګډ بانکي حساب د جوړولو او اعلاناتو په اړه د تفاهم لیک، حاضرۍ ته د کارکوونکو پر پابندۍ بحث او خبرې وشوې او د یادو موضوعاتو برخه کې لازمې پرېکړې هم وشوې.
