کندز؛ ۳۶ تنه رغېدلي رواني ناروغان خپلو کورونو ته ستانه شول
شنبه، ۶ ذو الحجه ۱۴۴۷
د افغاني سرې میاشتې له لوري د شمال ختیځ زون په کچه د کندز ولایت د رواني ناروغانو د ساتنې او درملنې له مرکز څخه ۳۶ تنه نارینه او ښځینه رغېدلي رواني ناروغان تر بشپړې درملنې وروسته خپلو کورونو ته ستانه شول.
په یاد مرکز کې دا مهال شاوخوا ۴۰۰ رواني ناروغان بستر دي، چې د کندز، تخار، بدخشان او بغلان ولایتونو څخه ور لېږدول شوي او په منظم ډول تر دوامدارې درملنې او روغتیايي څارنې لاندې ساتل کېږي.
د یادونې وړ ده، چې افغاني سره میاشت د هېواد په شپږو زونونو (کابل، کندهار، ننګرهار، بلخ، هرات او کندز) کې د رواني ناروغانو د ساتنې او درملنې مرکزونه لري، چې پکې رواني ناروغانو ته روغتیايي او رواني خدمات وړاندې کېږي.
افغاني سره میاشت هڅه کوي د رواني ناروغانو د ساتنې او درملنې مرکزونو له لارې هغوی ته د بېرته عادي ژوند د ورګرځېدو او ټولنې ته د ادغام زمینه برابره کړي.
