زابل؛ د افغاني سرې میاشتې د ولایتي مجامعو د نویو غړو ټاکل پیل شول
پنجشنبه، ۱۷ جمادی الأولى ۱۴۴۸
د افغاني سرې میاشتې له لوري په زابل ولایت کې د ولایتي مجامعو د نویو غړو د ټاکلو بهیر پیل شو، چې په لومړي پړاو کې یې د یاد ولایت په شینکۍ ولسوالۍ کې پنځه تنه د نویو غړو په توګه وټاکل شول.
د غړو د ټاکلو په موخه جوړه شوې غونډه کې سیمه ییزو مسؤولینو، قومي مشرانو، دیني عالمانو او لوستو ځوانانو ګډون کړی و، چې په ترڅ کې يې پنځه تنه د نويو غړو په توګه وټاکل شول.
د غونډې پر مهال ګډونوالو ته د افغاني سرې میاشتې د بشردوستانه فعالیتونو، اووه ګونو بنسټیزو اصولو او د ولایتي مجامعو د ارزښت، دندو او مسؤولیتونو په اړه معلومات وړاندې شول.
د ولایتي مجامعو نوي غړي به په خپلو سیمو کې د خلکو او افغاني سرې میاشتې ترمنځ د اړیکو په پیاوړتیا، د اړمنو خلکو د اړتیاوو په پېژندلو او د بشردوستانه خدمتونو په پراختیا کې فعاله ونډه ولري.
