نورستان؛ په کامدېش او برګمټال کې د جګړو له امله ۱۷ زره اغېزمنو کورنیو ته د مرستو وېش پای ته ورسېد
شنبه، ۱۵ ذو القعده ۱۴۴۷
د نورستان ولایت په کامدېش او برګمټال ولسوالیو کې د جګړو له امله ۱۷ زره اغېزمنو کورنیو ته د بشري مرستو وېش نن بشپړ شو.
د ټاکل شوي پلان له مخې، په کامدېش ولسوالۍ کې څه باندې ۱۰،۵۰۰ او په برګمټال کې څه کم ۶،۵۰۰ کورنیو ته مرستې ووېشل شوې.
دا مرستې د افغاني سرې میاشتې، د سره صلیب نړیوالې کمېټې او د خوړو نړیوال پروګرام په ګډې همغږۍ ترسره شوې.
په دغو مرستو کې هرې کورنۍ ته اوړه، غوړي، دال، مالګه او د لاسو مینځلو صابونونه ورکړل شول.
د یادو مرستو موخه د جګړه ځپلو کورنیو د لومړنیو اړتیاوو پوره کول او د هغوی د ژوند د ستونزو تر يو حده کمول و.
