کاپیسا ولایت کې د افغاني سرې میاشتې نمایندګۍ ته نوې ودانۍ رغول کېږي!
کاپیسا ولایت کې د افغاني سرې میاشتې نمایندګۍ ته نوې ودانۍ رغول کېږي!
نن یکشنبه، د ذوالقعدې میاشتې پر ۲۰ مه، د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور کاپیسا ولایت ته د سفر په ترڅ کې د یاد ولایت د والي ښاغلي حافظ احسان الله بریال، د نوموړي مرستیال، علماوو شورا رئیس، دولتي ادارو مسئولینو او کارکوونکو په شتون کې د دې خیریه ملي ټولنې اړوند نمایندګۍ نوې اداري ودانۍ د رغونې د بنسټ ډبره کېښوده.
د یادې ودانۍ د رغونې د پرانیستې پر مهال سرپرست عمومي رئیس د ټول هېواد په کچه د افغاني سرې میاشتې له لوري پر بېلابېلو روانو او نویو پروژو خوښي څرګنده کړه او د کاپيسا ولایت د نمایندګۍ سربیره یې د فراه، سمنګان او لوګر ولایتونو نمایندګیو لپاره د نویو اداري ودانیو رغونه، د ورځنيو چارو د ښه والي او تنظیم برخه کې اغېزمن ګام وباله او د هېوادوالو لپاره یې د لا ډېرو بشري خدماتو وړاندې کولو هيله څرګنده کړه.
ورپسې د کاپيسا ولایت والي ښاغلي حافظ احسان الله بریال په خپله وینا کې د هېواد په کچه د افغاني سرې میاشتې له هر اړخيزو بشرپالو خدماتو د ستاینې او قدردانۍ ترڅنګ د نوې اداري ودانۍ پر رغونه خوښي وښوده او دې برخه کې یې د هر ډول همکارۍ او همغږۍ ډاډ څرګند کړ.
