کابل؛ د افغاني سرې میاشتې عمومي رئیس د ځاځي اریوب له قومي مشرانو سره وکتل
دوشنبه، ۲۱ جمادی الأولی ۱۴۴۸
د افغاني سرې میاشتې عمومي رئیس په مرکزي دفتر کې د پکتیا ولایت د ځاځي اریوب ولسوالۍ له یو شمېر قومي مشرانو سره په کتنه کې د یادې ولسوالۍ د اړمنو، بې وزلو، داخلي بې ځایه شویو او راستنو شويو کډوالو کورنیو ستونزې او اړتیاوې واورېدې.
په دې کتنه کې قومي مشرانو د خپلې سیمې د زیانمنو کورنیو د وضعیت او بېړنیو اړتیاوو په اړه معلومات وړاندې کړل او د هغوی د ستونزو د حل او لومړنیو اړتیاوو د پوره کولو لپاره یې د افغاني سرې میاشتې د هر اړخيزې همکارۍ غوښتنه وکړه.
د افغاني سرې میاشتې عمومي رئیس د هغوی د ستونزو او غوښتنو له اورېدو وروسته وویل، چې دغه ټولنه د خپلو بشري فعالیتونو په ترڅ کې د هېواد په بېلابېلو سیمو کې له اړمنو او زیانمنو کورنيو سره مرستې کوي. نوموړي ډاډ ورکړ، چې د شته امکاناتو په پام کې نیولو سره به د ځاځي اریوب ولسوالۍ د اوسېدونکو ستونزو او غوښتنو ته د رسېدنې هڅې وکړي.
د کتنې په پای کې قومي مشرانو د افغاني سرې میاشتې د بشري فعالیتونو ستاینه وکړه او د یادې ولسوالۍ له زیانمنو او بې وزلو کورنیو سره یې د مرستو پر دوام ټینګار وکړ.
افغاني سره میاشت د هېوادوالو د اړتیاوو د درک او اړمنو خلکو د ملاتړ په موخه هڅه کوي، چې د خپلو بشري امکاناتو په چوکاټ کې د هېواد په بېلابېلو سیمو کې زیانمنو کورنیو ته اړینې مرستې ورسوي.
