اتصالات د کونړ زلزله ځپلو د لاسنیوي په موخه ۲ میلیونه افغانۍ نغدي مرسته وکړه
چهارشنبه، ۱۰ ربیعالأول ۱۴۴۷
کونړ ولایت کې د خونړۍ زلزلې له امله د زیانمنو شوو هېوادوالو د لاسنيوي او لومړنیو اړتیاوو پوره کولو په موخه د اتصالات مخابراتي شرکت د خیریه چارو مسئولینو ښاغلي انجنیر فرید احمد نوري او انجنیر حمید قریشي له لوري د افغاني سرې میاشتې د مالي چارو رئیس ښاغلي حافظ شبیر احمد عثماني ته د دوه میلیونه (۲،۰۰۰،۰۰۰) افغانیو نغدي مرستې چِک وسپارل شو.
د افغاني سرې میاشتې د مالي چارو رئیس د اتصالات مخابراتي شرکت د نغدي مرستې مننه وکړه او زیاته یې کړه، چې دغه ډول مرستې کولی شي د زلزله ځپلو کورنیو لومړنۍ اړتیاوې پوره کړي، نوموړي د هېواد په نورو خیر پالو او شتمنو وګړو هم غږ وکړ، څو په دې بېړني حالت کې د کونړ د زلزله ځپلو د لاسنیوي لپاره مرستې وکړي او ډاډ یې څرګند کړ، چې د یاد مخابراتي شرکت مرسته به په بشپړ شفافیت او عدالت پر زلزله ځپلو کورنیو ووېشل شي.
