کونړ زلزله ځپلو لپاره د سيد نادر شاه کياني کلتوري او ټولنيز بنسټ افغاني سرې میاشتې سره مرسته کوي
يکشنبه، ۵ ربیع الآخر ۱۴۴۷
په افغانستان کې د سيد نادر شاه کياني کلتوري او ټولنيز بنسټ مسئولینو د افغاني سرې میاشتې له عمومي رئیس ښاغلي شیخ الحدیث شهاب الدین دلاور او مرستیال ښاغلي حافظ عزیز الرحمن سره د کونړ زلزله ځپلو د لومړنیو اړتیاوو پوره کېدو په موخه نږدې راتلونکي کې څه د پاسه ۴۳ ټنه خوراکي توکو د سپارلو په موخه د همغږۍ او لوژستیکي چارو د تنظیم په موخه وکتل.
کتنه کې ښاغلي دلاور د دوی له مرستې مننه وکړه او د کونړ زلزله ځپلو لاسنیوی یې د ټولو افغانانو دیني او ملي مسئولیت وباله او له نورو خیرپالو هېوادوالو یې هم وغوښتل، څو د زلزله ځپلو سره مرستو ته لومړیتوب ورکړي.
د سيد نادر شاه کياني کلتوري او ټولنيز بنسټ مسئولینو د کونړ زلزله ځپلو ته د مرستو رسولو برخه کې د افغاني سرې میاشتې د هڅو ستاینه وکړه او ډاډ یې وړاندې کړ، چې د هغوی د ستونزو حل برخه کې به خپلو همکاریو ته دوام ورکړي.
د یادونې وړ ده چې یاده مرسته کې ۴۰ ټنه اوړه او څه د پاسه ۳ ټنه غوړي شامل دي، چې افغاني سرې میاشتې ته تر سپارلو وروسته به ډېر ژر پر زلزله ځپلو کورنیو ووېشل شي.
