کابل؛ د افغاني سرې میاشتې مرکزي روغتون کې د شونډو او تالو چاود لرونکو ناروغانو وړیا جراحي عملیات پیل شول
يکشنبه، ٢٣ ربيع الأول ۱۴۴۸
د افغاني سرې میاشتې په مرکزي روغتون کې د دې ادارې په همکارۍ د بنګلهدېش د «المرکز الاسلامي» د متخصص روغتیايي ټیم له لوري د شونډې او تالو چاود لرونکو ماشومانو د وړیا درملنې او جراحي عملیات پیل شول.
د پروګرام د پیل په مناسبت جوړې شوې غونډه کې د افغاني سرې میاشتې عمومي رئیس شیخ الحدیث شهاب الدین دلاور، له بنګلهدېش څخه راغلو متخصصو روغتیاپالانو ته د ښه راغلاست ترڅنګ، د بې وزله ماشومانو د درملنې او جراحي عملیاتو برخه کې د هغوی له همکاریو مننه وکړه.
ښاغلي دلاور وویل، د بې وزلو او اړمنو هېوادوالو روغتیايي ستونزو ته رسېدنه د افغاني سرې میاشتې له مهمو لومړیتوبونو څخه ده او هڅه کېږي هغو ناروغانو ته روغتیايي خدمات برابر شي چې د درملنې او جراحي عملیاتو د لګښت توان نه لري.
ورپسې، د بنګله دېش د «المرکز الاسلامي» استازي حمزه شهید الاسلام وویل، دا څلورم ځل دی چې د دوی روغتیايي ټیم د افغاني سرې میاشتې په مرکزي روغتون کې د شونډو او تالو چاود لرونکو ماشومانو درملنه او جراحي عملیات ترسره کوي.
د نوموړي په وینا، په تېرو درېیو پړاوونو کې د ۲۸۵ ماشومانو عملياتونه په بریالیتوب ترسره شوي او په روان پړاو کې به هم شاوخوا ۱۲۰ ماشومان تر درملنې او جراحي عملیاتو لاندې ونیول شي.
ښاغلي شهیدالاسلام د ناروغانو د درملنې او عملیاتو لپاره د افغاني سرې میاشتې له لوري د برابرو شویو روغتیايي اسانتیاوو او امکاناتو ستاینه وکړه او ویې ویل چې د دغو اسانتیاوو په شتون کې به عملیات په منظم ډول ترسره شي.
د افغاني سرې میاشتې د روغتیايي خدمتونو رئیس ډاکتر عبدالله عرفان هم په غونډه کې د دې ادارې د روغتیايي خدمتونو په اړه معلومات ورکړل.
نوموړي وویل، افغاني سره میاشت په خپل قلبي روغتون کې د هغو ماشومانو وړیا درملنه او جراحي عملیات ترسره کوي چې د زړه سوري ناروغۍ لري او کورنۍ یې د درملنې د لګښتونو د برابرولو توان نه لري.
ښاغلي عرفان همدارنګه په لرې پرتو سیمو کې اړمنو کورنیو ته د روغتیايي خدمتونو د وړاندې کولو په اړه معلومات ورکړل او د اړمنو هېوادوالو لپاره یې د روغتیايي خدمتونو د دوام او پراختیا ډاډ وښود.
