وړیا زده کړې او روښانه راتلونکی؛ کونړ کې ۱۵۰ زدهکوونکي د افغاني سرې میاشتې له ښوونیز مرکز فارغ شول
دوشنبه، ۲۹ رجب ۱۴۴۷
د کونړ ولایت د افغاني سرې میاشتې د ځوانانو او رضاکارانو په ښوونیز مرکز کې د انګلیسي، لیک لوست او کمپیوټر برخو له ۱۵۰ تنو زده کوونکو څخه د درې میاشتنیو زده کړو تر بشپړولو وروسته د پای آزموینه واخیستل شوه.
د یادې آزموینې د پای ته رسېدو په پار په جوړه شوې غونډه کې ممتاز او مخکښ زده کوونکي د ستاینلیکونو او ډالیو په ورکړې سره وستایل شول.
د یادونې وړ ده، چې یاد ښوونیز مرکز کې اوسمهال ۲۰۰ تنه هغه زده کوونکي، چې په شخصي ښوونیزو مرکزونو کې د فیس ورکولو توان نه لري؛ په اسلامي ښوونې او روزنې، انګلیسي، کمپیوټر او لیک لوست برخو کې په وړیا ډول زده کړې ترلاسه کوي.
