د افغاني سرې مياشتې د ټيبل ټينس له لوبډلې ۳ تنو لوبغاړو د ټېبل ټينس ملي لوبډلې ته لار ومونده!
افغاني سره میاشت تل هڅه کوي، چې هېوادوالو ته د ژوند په هر ډګر کې اسانتیاوې او فرصتونه برابرې کړي؛ په همدې موخه یې د هېواد په ۳۴ ولایتونو کې د ځوانانو او رضاکانو د ښوونې او روزنې په موخه ښوونیز مرکزونه رامنځ ته کړي، چې په یادو مرکزونو کې هرکال په زرګونو تنکي ځوانان په زده کړو او ورزشي فعالیتونو بوخت وي، چې په پایله کې يې د هېواد تنکیو ځوانانو او رضاکارانو د لوبو په هر ډګر کې افغاني سرې میاشتې ته لوی ویاړونه وربخښلي او ښې لاسته راوړنې یې لرلي.په همدې لړ کې د ټیبل ټینس ملي لوبډلې ته د لوبغاړو د غوراوي په موخه په جوزجان ولايت کې د هېواد په کچه په لاره واچول شویو سیالیو کې، چې د افغاني سرې میاشتې د ټېبل ټینس لوبډلې په شمول لسګونو لوبډلو په کې ګډون درلود؛ له سختو سیالیو وروسته د افغاني سرې میاشتې ۳ تنه لوبغاړي وتوانېدل،چې د ټېبل ټینس ملي ټیم ته لار ومومي. د ټیبل ټینس ملي لوبډلې ته د یادو لوبغاړو لار موندنه د افغاني سرې میاشتې لپاره یو ستر ویاړ او لاسته راوړنه ده.
