کابل؛ د افغاني سرې میاشتې عمومي رئیس د FCDO له نوې مشرې سره آنلاین ناسته وکړه
سې شنبه، ۲۹ جمادی الأولی ۱۴۴۸
د افغاني سرې میاشتې عمومي رئیس شیخ الحدیث شهاب الدین دلاور په افغانستان کې د ملي ټولنو نړیوال فدراسیون د مشر حسام فیصل په شتون کې د افغانستان لپاره د بریتانیا د بهرنیو چارو، مشترک المنافع او پراختیا ادارې (FCDO) د بشري مرستو د برخې له نوې ټاکل شوې مشرې باربارا لېک سره آنلاین تعارفي ناسته وکړه.
په دې ناسته کې د افغاني سرې میاشتې د بشري فعالیتونو، لاسته راوړنو او لومړیتوبونو په اړه معلومات شریک شول. همداراز د ژمي موسم په رارسېدو سره د اړمنو، راستنېدونکو او بې سرپرسته کورنیو د اړتیاوو او ستونزو په اړه هم خبرې وشوې.
شیخالحدیث دلاور د FCDO له لوري د ترسره شویو بشري مرستو او همکاریو مننه وکړه او د بشري فعالیتونو د دوام او پراختیا لپاره یې د همکاریو پر پیاوړتیا ټینګار وکړ.
نوموړي د افغاني سرې میاشتې د مرستونونو د فعالیتونو په اړه وویل، چې په دغو مرکزونو کې بې سرپرسته مېرمنو او ماشومانو ته د ساتنې، پالنې، روزنې او زده کړو زمینه برابره شوې او د هغوی د مهارتونو لوړولو لپاره بېلابېل حرفوي او روزنیز پروګرامونه پلي کېږي.
د افغاني سرې میاشتې عمومي رئیس همداراز د مرکزي روغتون، قلبي روغتون او په ټول هېواد کې د ثابتو او ګرځنده روغتیايي مرکزونو د فعالیتونو په اړه هم معلومات شریک کړل. نوموړي وویل چې د قلبي روغتون له لارې په ورځني ډول د زړه سوري لرونکو ماشومانو درملنه ترسره کېږي.
ښاغلي دلاور زیاته کړه چې افغاني سره میاشت له بې سرپرسته کورنیو سره میاشتني نغدي مرستې کوي او د مرستو په وېش کې بشپړ شفافيت په پام کې نيول کېږي.
نوموړي د وچکالۍ له امله د ګڼو کورنیو د اقتصادي وضعیت د خرابېدو په اړه هم خبرې وکړې او د ژمي موسم په درشل کې یې د اړمنو او راستنېدونکو کورنیو د اړتیاوو د پوره کولو لپاره د لا زیاتو همکاریو او مرستو غوښتنه وکړه.
د افغانستان لپاره د FCDO د بشري مرستو برخې نوې مشرې د افغاني سرې میاشتې بشري فعالیتونه او خدمتونه وستایل او د راتلونکو کلونو لپاره یې د بشري همکاریو د دوام ژمنه وکړه.
په ناسته کې د افغاني سرې میاشتې او FCDO ترمنځ د بشري همکاریو د دوام، د اړمنو کورنیو د ملاتړ او د راتلونکو همکاریو د پراختیا په اړه هم ګټور بحثونه وشول.
