هرات؛ په څلورو ناحیو کې د افغاني سرې میاشتې د ولایتي مجامعو نوي غړي وټاکل شول
شنبه، ۱۲ جمادی الأولى ۱۴۴۸
د افغاني سرې میاشتې له لوري د هرات ښار په څلورمه، شپږمه، یوولسمه او پنځلسمه ناحیو کې د ولایتي مجامعو د نویو غړو د ټاکنې او پېژندنې غونډې ترسره شوې، چې په کې یو شمېر مخور، قومي مشران او لوستي ځوانان د ولایتي مجامعو د نویو غړو په توګه وټاکل شول.
دې غونډو کې ګډونوالو ته د افغاني سرې میاشتې د بشري او روغتیايي فعالیتونو، د ولایتي مجامعو د ارزښت او د غړو د دندو او مسوولیتونو په اړه معلومات ورکړل شول.
همدا راز، د خلکو او افغاني سرې میاشتې ترمنځ د اړیکو د پیاوړتیا پر اهمیت هم ټینګار وشو.
د يادونې وړ ده، چې د ولایتي مجامعو نوي غړي به په خپلو اړوندو سیمو کې د خلکو د ستونزو او اړتیاوو په پېژندلو، له افغاني سرې میاشتې سره په بشردوستانه فعالیتونو کې د همغږۍ او د اړمنو خلکو د اړتیاوو په شریکولو کې فعاله ونډه واخلي.
