کابل؛ بریتانیا سره صلیب له افغاني سرې میاشتې سره د ۲.۵ میلیونه پونډو نغدي مرستې ژمنه وکړه
چهارشنبه، ۷ جمادى الآخره ۱۴۴۸
د بریتانیا سره صلیب د نړیوالو چارو اجرائیوي مشر ریچارډ بلویټ د افغاني سرې میاشتې له عمومي رئیس شیخ الحدیث شهاب الدین دلاور سره په لیدنه کې، د اقلیمي بدلونونو له امله له زیانمنو شویو کورنیو سره د مرستې لپاره د ۲.۵ میلیونه بریتانوي پونډو د نغدي مرستې ژمنه وکړه.
په دې لیدنه کې چې د افغانستان او پاکستان لپاره د بريتانيا د سره صليب استازي جېرمي سمېت هم شتون درلود، د دواړو ادارو ترمنځ د بشري همکاریو، روغتیايي خدمتونو او د پنځه کلن مشارکتي تړون له مخې د همکاریو د دوام په اړه خبرې وشوې.
د افغاني سرې میاشتې عمومي رئیس د دغې ادارې د بشري او روغتیايي خدمتونو په اړه معلومات وړاندې کړل او ویې ویل چې افغاني سره میاشت د بې سرپرسته مېرمنو د ملاتړ او ځان بسیاینې، پېښځپلو او راستنېدونکو کډوالو د لاسنیوي، رواني ناروغانو د درملنې او د قلبي روغتون له لارې د سوري زړه ناروغۍ لرونکو ماشومانو د درملنې او عملیاتو ترڅنګ، په لرې پرتو سیمو کې هم روغتیايي خدمتونه وړاندې کوي.
شيخ الحديث دلاور د بشري او روغتیايي خدمتونو د لا پراختیا لپاره د بریتانیا سره صلیب همکارۍ مهمې وبللې او ددې همکاریو د پراخېدو غوښتنه یې وکړه.
بلویټ د افغاني سرې میاشتې بشري او روغتیايي خدمتونه اغېزمن وبلل او د مرکزي او قلبي روغتونونو او مرستون له لارې یې ترسره کېدونکي خدمتونه وستایل.
افغاني سره میاشت د خپلو بشري او روغتیايي خدمتونو د پراختیا لپاره د نړیوال غورځنګ له غړو سره د همغږۍ او همکاریو پیاوړتیا ته دوام ورکوي، څو د زیانمنو او اړمنو خلکو اړتیاوو ته لا اغېزمنه رسېدنه وشي.
