سعودي عربستان افغاني سرې میاشتې سره د ١٠٠ ټنه خُرماوو مرسته ترسره کړه!
سعودي عربستان افغاني سرې میاشتې سره د ١٠٠ ټنه خُرماوو مرسته ترسره کړه!
نن یکشنبه د رجب د میاشتې پر ۲۵مه، د سعودي عربستان هېواد له لوري له اړمنو او بېوزلو کورنیو سره د مرستې په موخه افغاني سرې میاشتې ته ۱۰۰ ټنه خُرما د سرپرست عمومي رٸيس ښاغلي شیخ الحدیث شهاب الدین دلاور، د نوموړي د مرستيال ښاغلي حافظ عزيز الرحمن او په افغانستان کې د سعودي عربستان د سفير ښاغلي فيصل بن طلق البقمي په شتون کې وسپارل شوه.
د یادې مرستې د سپارلو پر مهال د افغاني سرې میاشتې سرپرست عمومي رئيس د سعودي عربستان له دوامداره او همېشنیو مرستو څخه د مننې ترڅنګ د دواړو هېوادونو ترمنځ اړیکې له عقيدتي او فرهنګي پلوه تاريخي او مهمې وبللې.
دا راز ښاغلي دلاور افغانستان د تېرو څو لسيزو ناخوالو او اقليمي بدلونونو له امله یو ځپل شوی هېواد یاد کړ او له ټولو کورنيو او بهرنيو خیریه بنسټونو څخه یې د بیړنیو او اړینو مرستو غوښتنه وکړه.
ورپسې په افغانستان کې د سعودي عربستان سفير په خپلو څرګندونو کې خوښې څرګنده کړه، چې توانېدلي د افغانانو لاسنیوی وکړي او راتلونکي کې یې د ورته بشرپالو مرستو د دوام ژمنه وکړه.
