د روزونکو د ظرفیت لوړونې ورکشاپ دایرشو
سه شنبه د ذوالحجې پر ۲۷مه د بشري سرچینو ریاست د اداري پراختیا د آمریت له لوري د اووه سیمه ییزو زونونو او مرکزي دفترونو مدیرانو د ظرفیت لوړونې په موخه دوه ورځنی ښوونیز ورکشاپ د نړیوال سره صلیب د استازې مېرمن شارټ خوزي مورل په شتون کې د افغاني سرې میاشتې د سرپرست عمومي رییس ښاغلي مولوي مطیع الحق خالص له لوري پرانیستل شو.
دا ښوونیز ورکشاپ چې د نړیوال سره صلیب په مالي مرسته ترسره شو موخه یي؛ خوندي لاسرسی، د محافظت او مصؤنیت ریاست فعالیتونه، د روغتیایي خدماتو فعالیتونه، د کابل مرستون د پروګرامونو پېژندنه، د رضاکارانو او کارکوونکو چلند او سلوک رانغاړي.
د افغاني سرې میاشتې سرپرست عمومي رییس ښاغلي مولوي مطیع الحق خالص ګډونوالو ته د ښه راغلاست ترڅنګ وویل: کومې مرستې چې د نړیوال سره صلیب له لوري په افغانستان کې شوي د ستایلو وړ دي، دا ځل یې د ظرفیت لوړونې په موخه مرسته کړې باید له تجربو څخه یې ګټه پورته شي ځکه افغاني سره میاشت او ټولنه ورته اړتیا لري همدارنګه نوموړي زیاته کړه؛ په خپلو کارونو کې باید اخلاص ولرو او هڅه باید وشي ترڅو په لرو پرتو سیمو کې له پېښځپلو سره بشرپال خدمتونه په خپل وخت ترسره شي.
