د افغانې سرې میاشتې او نړیوال فدراسیون ترمنځ د همکاریو د پیاوړتيا په موخه ناسته وشوه!
د افغانې سرې میاشتې او نړیوال فدراسیون ترمنځ د همکاریو د پیاوړتيا په موخه ناسته وشوه!
د افغاني سرې میاشتې سرپرست سکرتر جنرال ښاغلي مولوي روح الله عبدالسلام نن دوشنبه د ذوالقعدې میاشتې پر ۲۱ مه، په خپل کاري دفتر کې په افغانستان کې د نړیوال فدراسیون له سرپرست مسٸول ښاغلي میلن ګیزدا ویک او د آسیا پاسفيک حوزې د پلان جوړونې، څارنې، ارزونې او راپور ورکولو د تضمین کیفیت مشرې آغلې پووا الیس هو سره وکتل.
ناسته کې سرپرست سکرتر جنرال په وېتنام کې د ۵۱ ملي ټولنو د آسیا پاسفیک حوزې په تېر یوولسم کنفرانس کې د دې خیریه ملي ټولنې د مخکنۍ رهبرۍ له لوري د کارونو په اړه شویو تعهداتو ته ژمنتیا وښوده او دا راز یې له افغاني سرې میاشتې سره د بشري خدماتو په برخه کې د نړیوال فدراسیون د دوامداره همکارۍ، هڅو او غوره همغږۍ څخه هم مننه وکړه.
ورپسې د آسیا پاسفيک حوزې لپاره د پلان جوړونې، څارنې، ارزونې او راپور ورکولو د تضمین کیفیت مشرې په خپل معلوماتي پریزنټیشن کې په تېر کنفرانس کې د بحث شویو موضوعاتو په هکله خبرې وکړې او په یاد کنفرانس کې یې د رضاکارانو د خدماتو، ملي ټولنو د تقویت او پياوړتيا، اقليمي بدلون، طبيعي پېښو ته د چمتووالي او ملي ټولنو ته د داخلي عایداتي سرچینو موندلو په اړه د بحث شویو موضوعاتو او په ځينو برخو کې د شویو تعهداتو په هکله لازم معلومات وړاندې کړل او هم یې د چارو د لاښه والي په برخه کې له افغاني سرې میاشتې سره د هر ډول همکارۍ ژمنه وکړه.
