د افغاني سرې مياشتې سره د روغتيايي خدماتو د پراختيا او راستنېدونکو کډوالو د لاسنيوي په موخه د ۱.۷ میلیونه یورو نغدي مرستې ژمنه وشوه
کابل، پنجشنبه، ۲۲ ذوالحجه ۱۴۴۶ هـ.ق
د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور، او مرستيال يې ښاغلي حافظ عزیزالرحمن د افغانستان لپاره د ملي ټولنو د نړیوال فدراسیون له مسٸول ښاغلي سمع الفخوري سره د راستنېدونکو کډوالو د ملاتړ او روغتیايي همکاريو د پراختيا په موخه وکتل.
په کتنه کې سرپرست عمومي رئیس د نړيوال فدراسیون له لوري د دوامداره بشرپالو مرستو او مالي همکاریو مننه وکړه او غوښتنه يې وکړه څو د اړمنو ناروغانو او راستنېدونکو کډوالو لپاره د لا زیاتو بېړنيو او پراخو مرستو برابرولو زمينه برابره کړي.
ښاغلي سمع الفخوري ډاډ ورکړ چې ايرلينډ هېواد به نزدې راتلونکي کې د روغتیايي خدمتونو د پراختيا لپاره ۱.۲ میلیونه یورو او نیوزیلنډ او هالینډ هېوادونه به د کډوالو د ملاتړ په موخه ۵۰۰ زره یورو مرسته ترسره کړي.
نوموړي همدا راز ژمنه وکړه چې د بشري مرستو د لا جذب لپاره به د افغاني سرې میاشتې رئیس ته د جنیوا سفر زمینه برابره کړي او د اروپایي هېوادونو د ملي ټولنو له مسؤلینو سره به د اړمنو د ملاتړ موضوع هم شریکه کړي.
