هرات؛ ۳۷ رواني ناروغان تر بشپړې درملنې وروسته خپلو کورونو ته ستانه شول
یکشنبه، ۲ ربیع الأول ۱۴۴۸
د افغاني سرې میاشتې له لوري د لویدیځ زون په کچه په هرات ولایت کې د رواني ناروغانو د ساتنې او درملنې له مرکز څخه ۳۷ تنه نارینه ناروغان تر بشپړې درملنې او روغېدو وروسته، د یوې غونډې په ترڅ کې خپلو کورنيو ته وسپارل شول.
د افغاني سرې میاشتې له لوري هر یوه روغ شوي شخص ته کورونو ته تر رسېدو پورې د ترانسپورټي لګښتونو لپاره ۵۰۰۰ افغانۍ هم ورکړل شوې.
په یاد مرکز کې اوس مهال ۱۱۶۴ تنه رواني ناروغان تر درملنې او پاملرنې لاندې دي، چې ۴۰۴ تنه یې داخلي او ۷۶۰ تنه نور له مرکز څخه بهر روغتیايي خدمتونه ترلاسه کوي.
افغاني سره میاشت د هېواد په شپږو زونونو؛ کابل، کندهار، ننګرهار، بلخ، هرات او کندز کې د رواني ناروغانو د ساتنې او درملنې مرکزونه لري، چې پکې ناروغانو ته د درملنې، روغتیايي پاملرنې او مناسبې ساتنې خدمتونه وړاندې کېږي.
د رواني ناروغانو د درملنې ترڅنګ، د هغوی د انساني کرامت، رواني هوساینې او مناسبې پاملرنې لپاره د خوندي او منظم چاپېریال برابرول د افغاني سرې میاشتې د روغتیايي خدمتونو له مهمو برخو څخه دي.
