۳۵ تنه رواني ناروغان تر بشپړې درملنې او رغېدو وروسته خپلو کورنيو ته و سپارل شول!
۳۵ تنه رواني ناروغان تر بشپړې درملنې او رغېدو وروسته خپلو کورنيو ته و سپارل شول!
د افغاني سرې میاشتې د روغتیا ریاست اړوند د کابل رواني ناروغانو د درملنې او پالنې له مرکز څخه نن یکشنبه، د ذوالقعدې میاشتې پر ۱۳مه، ۱۸ نارینه او ۱۷ تنه ښځينه رواني ناروغان تر بشپړې درملنې او رغېدو وروسته د دې خيریه ملي ټولنې د سرپرست عمومي رئیس ښاغلي شیخ الحدیث شهاب الدین دلاور، د نوموړي مرستیال ښاغلي حافظ عزیز الرحمن، سرپرست سکرتر جنرال ښاغلي مولوي روح الله عبدالسلام، په افغانستان کې د نړیوال فدراسیون سرپرست ښاغلي مېلن ګېزداویک، مل پلاوي او يو شمېر نورو مسئولینو په شتون کې خپلو کورنيو ته وسپارل شول.
کورنیو ته د یادو روغو شویو رواني ناروغانو د سپارلو پر مهال سرپرست عمومي رئیس د تداوي شویو رواني ناروغانو پر روغتیا خوښي وښوده او د روغو شویو رواني ناروغانو ترڅنګ یې د هغوی کورنيو ته مبارکي ورکړه.
ښاغلي دلاور په خپلو څرګندونو کې په یاده ناروغۍ د اخته کېدو اصلي لامل تېرې پرلپسې ناخوالې او ورځنۍ ستونزې یادې کړې او زیاته یې کړه " افغاني سرې میاشتې د یادې ستونزې د حل په پار د رواني ناروغانو د درملنې او پالنې په ټولو مرکزونو کې د ناروغانو د ښې پالنې او درملنې په موخه متخصص روغتیاپالان او کارکوونکي ګمارلي چې رواني ناروغانو ته د درملو، خوراک، څښاک، پوښاک او پاکوالي برخه کې هر اړخیز خدمات وړاندې کوي او د هغوی د روغتیا لپاره نه ستړې کېدونکې هلې ځلې کوي."
ورپسې په افغانستان کې د نړیوال فدراسیون سرپرست مسئول د رواني ناروغانو د درملنې او پالنې برخه کې د افغاني سرې میاشتې د هڅو ستاینه وکړه او یاده یې کړه چې کندهار ولایت کې د ښځينه رواني ناروغانو د درملنې او پالنې مرکز لپاره د روغتیايي خدماتو په موخه د نړیوال فدراسیون د آسیا پاسفيک سیمه یيز مسئول له خپلې بودیجې څخه د ۱۰۰ زره سویسي فرانکو د ځانګړي کولو ژمنه کړې او دې برخه کې یې د لا ډيرو مرستو چمتو کولو ډاډ وړاندې کړ.
غونډه کې د افغاني سرې میاشتې د مرکزي روغتون رئیس ډاکتر عبدالولي اتمانزي هم د هېواد په کچه په (کابل، کندهار، ننګرهار، بلخ، هرات او کندز) ولایتونو کې د رواني ناروغانو د درملنې او پالنې مرکزونو کې د ترسره کېدونکو خدماتو په هکله معلومات وړاندې کړل او یادونه یې وکړه چې دا مهال ۹۱۶ تنو ناروغانو ته په رواني مرکزونو او ۴۵۶۸ تنو ته په خپلو کورونو کې روغتیايي خدمات وړاندې کېږي او وخت په وخت د اړونده روغتياپالانو له لوري د اړتیا وړ درمل ورکول کیږي.
همدارنګه ناسته کې د روغو شویو رواني ناروغانو په استازولۍ ۳ تنو روغو شویو اشخاصو په پښتو، دري او انګلیسي ژبو د افغاني سرې میاشتې مننه وکړه چې د دوی د روغتیا برخه کې یې هلې ځلې کړي دي او د هېواد له خیرپاله شتمنو او مرستندویه بنسټونو یې غوښتنه وکړه، څو له افغاني سرې میاشتې څخه خپلې مرستې ونه سپموي.
د یادونې وړ ده چې روغو شویو رواني ناروغانو ته د رخصت کېدو پر مهال پنځه پنځه زره افغانۍ، جامې، څپلۍ او ځينې نور اړین توکې هم ورکړل شول، څو وکولی شي د ژوند لومړنۍ اړتیاوې پرې پوره کړي.
