بلخ؛ ۱۵۳۰ کاریګرو ته د نږدې اته میلیونه افغانیو د مزد د ورکړې لړۍ پیل شوه
یکشنبه، ۱۹ المحرم ۱۴۴۸
د افغاني سرې میاشتې له لوري د بلخ ولایت په کشنده، شولګره، البرز او مارمل ولسوالیو کې د کار په بدل کې د نغدو پیسو د پروګرام په چوکاټ کې ۱۵۳۰ تنو مسلکي او غیرمسلکي کاریګرو ته د ۷ میلیونه، ۷۵۰ زره او ۲۵۰ افغانیو د مزد د ورکړې لړۍ پیل شوه.
د دې لړۍ په لومړي پړاو کې د کشندې ولسوالۍ ۴۸۶ تنو کاریګرو ته ۲ میلیونه، ۵۰۵ زره او ۶۰۰ افغانۍ ووېشل شوې. ټاکل شوې ده، چې په راتلونکو ورځو کې به د شولګرې، البرز او مارمل ولسوالیو پاتې کاریګرو ته هم د دوی مزد ورکړل شي.
یادو کاریګرو د تېرې یوې میاشتې په ترڅ کې په یادو ولسوالیو کې د پاکو اوبو د ۵۱۰ حلقو کندو د بیارغونې چارې بشپړې کړې، چې ورسره به د سیمې د اوسېدونکو د پاکو اوبو د لاسرسي ستونزې تر ډېره هوارې شي.
دغه پروژه د ډنمارک سره صلیب په مالي ملاتړ پلې شوې، چې موخه یې د کار په بدل کې د نغدو پیسو له لارې د اړمنو کورنیو د معیشت ملاتړ او د بنسټیزو تاسیساتو بیارغونه ده.
افغاني سره میاشت د ورته پروګرامونو له لارې د اړمنو کورنیو د معیشت د پیاوړتیا ترڅنګ، د هېوادوالو د خودکفايۍ او د ژوند د شرایطو د ښه کولو لپاره دوامداره هڅې کوي.
