کابل؛ د ستراتیژیکې همغږۍ او اداري پرمختګ درې ورځنی ورکشاپ پیل شو
یکشنبه، ۳۰ ذو القعده ۱۴۴۷
د افغاني سرې میاشتې د مالي او داخلي پلټنې ریاستونو، کنټرول او پلان جوړونې آمریتونو ۲۱ کارکوونکو ته د ستراتیژیکې همغږۍ او اداري پرمختګ د بيا کتنې په اړه درې ورځنی روزنیز ورکشاپ پیل شو.
د ورکشاپ د پرانیستې پر مهال د افغاني سرې میاشتې د مالي چارو رئیس حافظ شبیر احمد عثماني د دغه پروګرام پر اهمیت خبرې وکړې او ویې ویل، چې د دې ورکشاپ له لارې به د کارکوونکو د مسلکي وړتیاوو لوړونې، اداري همغږۍ او د چارو د لا ښه تنظیم اړوند مهم موضوعات شریک شي.
نوموړي له ګډونوالو وغوښتل، څو له دې فرصت څخه اغېزمنه ګټه واخلي او خپلې چارې په منظم او مسؤولانه ډول ترسره کړي.
ټاکل شوې ده، چې په دې ورکشاپ کې به ګډونوالو ته د ستراتیژیکې همغږۍ، مالي پراختیا، بهرنیو پلټنو او غیر مستقیمو لګښتونو اړوند لازم معلومات او عملي لارښوونې وړاندې شي.
دغه ورکشاپ په افغانستان کې د ناروې سره صلیب په مالي ملاتړ تنظیم شوی دی.
افغاني سره میاشت هڅه کوي د مسلکي روزنیزو پروګرامونو له لارې د خپلو کارکوونکو ظرفیتونه لوړ او د اداري چارو اغېزمنتیا لا پیاوړې کړي.
