کابل؛ د افغاني سرې میاشتې اړوند ۶ دوکانونه د کرایې لپاره مزایدې ته وړاندې شول
شنبه، ۲۹ ذو القعده ۱۴۴۷
د کابل ښار د لومړۍ ناحیې اړوند د منډوي په بازار کې د افغاني سرې میاشتې اړوند ۶ دوکانونه د کرایې په موخه په جلا جلا توګه مزایدې ته وړاندې شول.
یاده مزایده د افغاني سرې میاشتې د تهیې او تدارکاتو آمریت له لوري تنظیم شوې وه، چې پکې د هر دوکان لپاره له ۳ تر ۴ سوداګریزو شرکتونو، حکمي او حقیقي اشخاصو ګډون کړی و.
ټاکل شوې ده، چې د ګډونوالو د اسنادو تر ارزونې او کره کتنې وروسته به د یادو دوکانونو قراردادونه له شرایطو سره سم هغو شرکتونو او اشخاصو ته ورکړل شي، چې تر ټولو لوړ نرخونه یې وړاندې کړي وي.
افغاني سره میاشت هڅه کوي د خپلو شتمنیو د شفاف مدیریت او اغېزمنې ګټې اخیستنې له لارې د بشري خدمتونو د پراختیا لپاره پایداره مالي سرچینې پیاوړې کړي.
