لوګر؛ د افغاني سرې میاشتې مرستیال د ودانیزې پروژې له بهیر څخه لیدنه وکړه
پنجشنبه، ۲۹ شوال ۱۴۴۷
د افغاني سرې میاشتې مرستیال، ښاغلي حافظ عزیز الرحمن، لوګر ولایت ته د خپل رسمي سفر پر مهال د دې ولایت د نماینده ګۍ د نوې اداري ودانۍ له رغنیزو چارو څخه لیدنه وکړه او د کارونو د چټکتیا سپارښتنه یې وکړه.
نوموړي د نماینده ګۍ له رئیس او د پروژې له څارونکو وغوښتل، چې د رغنیزې پروژې بهیر په منظم او دوامداره ډول وڅاري، څو چارې له ځنډ او خنډ پرته پر مخ ولاړې شي.
هغه همدارنګه د یادې ولایتي څانګې له بېلابېلو برخو څخه لیدنه وکړه او د کارکوونکو ترمنځ یې پر همغږۍ او منظم فعالیت ټینګار وکړ، څو چارې په اغېزمن ډول ترسره شي.
د مسؤولينو دا ډول لیدنې او ارزونې د پروژو د چټکتیا، کیفیت او اغېزمنتیا د تضمین ترڅنګ د کارونو د منظم تعقیب او همغږۍ په پیاوړتیا کې مهم رول لري.
