د افغاني سرې میاشتې مشرتابه له نړیوالو کاري شریکانو سره د روژه ماتي ګډ مجلس وکړ
سې شنبه، ۲۱ رمضان المبارک ۱۴۴۷
د افغاني سرې میاشتې له لوري تېر ماښام په کابل کې د دې ادارې نړیوالو کاري شریکانو ته د افغاني دود او مېلمهپالنې له مخې د روژه ماتي مېلمستیا چمتو او ګډ مجلس ترسره شو.
په دې مجلس کې د افغاني سرې میاشتې عمومي رئیس، شیخ الحدیث شهاب الدین دلاور، د نوموړي مرستیال حافظ عزیز الرحمن، د سکرتر جنرال مرستیالانو، د مرکزي دفتر رئیسانو، د مقام سلاکارانو او په افغانستان کې د نړیوالو کاري شریکانو استازو ګډون درلود.
په دغو کاري شریکانو کې د سره صلیب نړیواله کمېټه (ICRC)، د سره صلیب او سرې میاشتې نړیوال فدراسیون (IFRC)، د قطر او ترکیې سرې میاشتې، د ډنمارک او ناروې د سره صليب ټولنې شاملې وې.
د افغاني سرې میاشتې عمومي رئیس په خپلو خبرو کې د تېرو څو کلونو په ترڅ کې د طبیعي او بشري ناورینونو پر مهال د نړیوالو کاري شریکانو له همکاریو مننه او ستاینه وکړه.
هغه وویل: د نړیوالو مرستندویه ادارو ملاتړ د اړمنو وګړو په لاسنیوي کې مهم او اغېزناک رول لوبولی دی.
نوموړي زیاته کړه: افغانستان دا مهال د طبیعي پېښو، بېوزلۍ او پراخو بشري اړتیاوو له جدي ننګونو سره مخ دی او افغاني سره میاشت هڅه کوي څو له خپلو نړیوالو شریکانو سره په همغږۍ د هېواد په بېلابېلو سیمو کې زیانمنو وګړو ته پر وخت مرستې ورسوي.
له بلې خوا، د نړیوالو کاري شریکانو استازو هم په خپلو خبرو کې د افغاني سرې میاشتې د فعالیتونو ستاینه وکړه.
هغوی څرګنده کړه: افغاني سره میاشت د هېواد په سختو شرایطو کې د اړمنو، بېسرپرسته کورنیو او پېښځپلو تر څنګ ولاړه پاتې شوې ده.
هغوی ټینګار وکړ چې خپلو بشري مرستو او همکاریو ته به دوام ورکړي، څو د طبیعي پېښو او بېړنیو حالاتو پر مهال زیانمنو وګړو ته پر وخت او اغېزمنې مرستې ورسول شي.
