د افغاني سرې میاشتې د رهبرۍ او فاطمه ګیلاني روغتون د مسئولینو ترمنځ یاد روغتون کې د سوري زړه په رنځ د اخته ناروغانو د درملنې بهیر د پیل او چمتووالي په موخه ناسته وشوه!
د افغاني سرې میاشتې د رهبرۍ او فاطمه ګیلاني روغتون د مسئولینو ترمنځ یاد روغتون کې د سوري زړه په رنځ د اخته ناروغانو د درملنې بهیر د پیل او چمتووالي په موخه ناسته وشوه!
نن چهارشنبه د شوال میاشتې پر ۲۵مه، د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور، د دې خیریه ملي ټولنې مرستیال ښاغلي حافظ عزیز الرحمن او سرپرست سکرترجنرال ښاغلي مولوي روح الله عبدالسلام، مرکزي دفتر کې د افغاني سرې میاشتې اړوند د فاطمه ګیلاني روغتون له روغتیاپالانو سره یاد روغتون کې د سوري زړه ناروغانو د درملنې او عملیاتو برخه کې د لازمو تجهیزاتو برابرولو او شته ستونزو د حل په موخه ناسته وکړه.
ناسته کې سرپرست عمومي رئیس د سوري زړه ناروغانو د درملنې، یاد بهیر کې د چټکتیا او لګښتونو د کمښت له مخې د دې روغتون فعالول مهم وبلل او روغتیاپالانو سره یې د اړینو تجهیزاتو برابرولو برخه کې د بشپړې همکارۍ ژمنه وکړه. همدا راز ښاغلي دلاور یاد روغتون کې د متخصصو روغتیاپالانو ګمارنه، له خیانت څخه مخنیوی او د بېوزله ناروغانو په درملنه کې له سستۍ څخه ځان ساتل د ټولو ګډ مسئولیت یاد کړ او روغتیاپالانو ته یې لارښوونه وکړه، ترڅو د اړمنو او بې وزله هېوادوالو په درملنه کې له بشپړ صداقت او اخلاص څخه کار واخلي.
ورپسې روغتیاپالانو خپلې اړتیاوې، تجربې او وړاندیزونه د رهبرۍ له غړو سره شریک کړل او د روغتون د لا ښه والي او په غوره توګه د خدماتو وړاندې کولو ژمنه یې وکړه.
