۱۵۰ تنه اړمن زده کوونکي د حرفوي زده کړو تر بشپړولو وروسته فارغ شول!
۱۵۰ تنه اړمن زده کوونکي د حرفوي زده کړو تر بشپړولو وروسته فارغ شول!
نن چهارشنبه د شعبان المعظم د میاشتې پر ۲۶ مه، د افغاني سرې میاشتې په تخنیکي او د صندوق القطر په مالي مرسته د هلمند، فراه او فاریاب ولایتونو ۱۵۰ اړمن تنه زده کوونکي، چې پنځه میاشتې وړاندې افغان کوریا انستيتوت ته ورپېژندل شوي و، د کمپيوټر، برېښنا، خیاطۍ او نلدوانۍ برخو کې د حرفوي زده کړو تر بشپړولو وروسته فارغ شول.
په دې مناسبت جوړه شوې فراغت غونډه کې د افغاني سرې میاشتې د سرپرست عمومي رئیس ښاغلي شیخ الحدیث شهاب الدین دلاور او د نوموړي د مرستیال ښاغلي حافظ عزیز الرحمن سربېره په افغانستان کې د قطر د سرې میاشتې مسئول ښاغلي حسین بوتاني او ددې خيريه ملي ټولنې د مرکزي ریاستونو يو شمېر رئیسانو او کارکوونکو هم ګډون درلود.
غونډې ته د وینا پر مهال د افغاني سرې میاشتې سرپرست عمومي رئیس په خپلو څرګندونو کې د قطر هېواد له دوامداره بشرپاله مرستو او همکاریو مننه وکړه او د ورته پروژو پلي کول یې د اړمنو او بې وزله کورنیو د ځان بساینې برخه کې اغېزمن او مهم وبلل او د دا ډول پروژو د پلي کولو برخه کې یې له کورنیو او بهرنیو مرستندویه بنسټونو د همکاريو غوښتنه وکړه. دا راز ښاغلي دلاور زده کوونکو ته د فراغت د مبارکۍ ترڅنګ هغوی ته له الله سبحانه وتعالی څخه د غوره خدمت کولو د توفیق غوښتنه هم وکړه.
ورپسې د افغاني سرې میاشتې مرستیال د یوې سالمې ټولنې د رامنځته کولو برخه کې د ځوانانو د روزنې او اړونده مسئولیتونو په هکله هر اړخیز معلومات وړاندې کړل او د يوې ټولنې په پرمختګ کې یې د لوستو او مسلکي ځوانانو ونډه مهمه یاده کړه.
همدا ډول په افغانستان کې د قطر د سرې میاشتې مسئول ښاغلي حسین بوتاني په خپلو څرګندونو کې د یادې پروژې د تطبیق برخه کې د افغاني سرې میاشتې غوره همغږي وستایله او ژمنه یې وکړه، چې راتلونکي کې که به هم د ورته پروژو د برابرولو برخه کې هڅې کوي او له افغاني سرې میاشتې سره به خپلې همکارۍ زیاتوي.
