کابل؛ ۲۳۱ راستنو شویو کورنیو ته د کوچنیو کاروبارونو د پیل لپاره ۳ میلیونه او ۴۶۵ زره افغانۍ نغدي مرسته ووېشل شوه
یکشنبه، ۹ ربیع الأول ۱۴۴۸
د افغاني سرې میاشتې له لوري د کابل ښار په ۱۲مه او ۲۱مه ناحیو کې ۲۳۱ راستنو شویو کډوالو کورنیو ته د کوچنیو کاروبارونو د پیل او پیاوړتیا لپاره د دویم پړاو په ترڅ کې ۳ میلیونه او ۴۶۵ زره افغانۍ نغدي مرسته ووېشل شوه.
یاده مرسته د ملي ټولنو نړیوال فدراسیون له لوري چمتو شوې وه، چې له مخې یې هرې کورنۍ ۱۵ زره افغانۍ ترلاسه کړې،څو وکولی شي د خپلو کاري اړتیاوو له مخې اړین توکي او وسایل وپېري او خپل کوچني کاروبارونه پیاوړي کړي.
د پېرلو بهیر د اسانتیا لپاره د هرو ۱۰ کورنیو لپاره یو رضاکار هم ټاکل شوی و، څو د اړینو توکو او وسایلو د پېرلو په برخه کې له دوی سره همکاري او همغږي وکړي.
دغه نغدي مرسته د راستنو شویو کورنیو د ځان بسیاینې او د دوامدار عاید د رامنځته کولو په موخه ترسره شوه، چې له لارې به یې وکولی شي د خپلو اړتیاوو او وړتیاوو له مخې کوچني کاروبارونه پیل او یا پراخ کړي.
