هرات؛ د ترکیې آی ایچ ایچ بنسټ ۱۱۸.۲ ټنه بشري مرسته افغاني سرې میاشتې ته وسپارله
پنجشنبه، ۲۹ صفر ۱۴۴۸
د ترکیې آی ایچ ایچ خیریه بنسټ ۱۱۸.۲ ټنه د غير خوراکي توکو بشري مرسته په هرات ولایت کې افغاني سرې میاشتې ته وسپارله.
دغه مرسته د اړمنو کورنیو د لاسنیوي او جوماتونو او مدرسو د اړتیاوو د پوره کولو په موخه افغانستان ته رالېږل شوې، چې له نسجي موادو څخه جوړې غالۍ او فرشونه پکې شامل دي.
د مرستې د سپارلو په مراسمو کې د افغاني سرې میاشتې د لویدیځ زون رئیس الحاج ډاکټر عبدالبصیر رحماني، د دې ادارې یو شمېر کارکوونکو او د آی ایچ ایچ خیریه بنسټ استازو ګډون کړی و.
د افغاني سرې میاشتې د لویدیځ زون رئیس د آی ایچ ایچ خیریه بنسټ د بشري همکاریو او ملاتړ مننه وکړه او ویې ویل، چې دغه مرسته به مرکزي دفتر ته تر لېږد وروسته د اړتیاوو او ټاکل شویو لومړیتوبونو له مخې په اړوندو برخو کې ووېشل شي.
افغاني سره میاشت د خپلو کاري شریکانو په همکارۍ هڅه کوي، چې د اړمنو هېوادوالو د لاسنیوي لپاره بشري مرستې راجلب او د اړتیاوو او لومړیتوبونو پر بنسټ یې مستحقو کسانو او اړوندو برخو ته ورسوي.
