پکتیا؛ د درې میلیونه افغانیو په ارزښت د کار په بدل کې د نغدو پیسو پروژه پیل شوه
یکشنبه، ۱۸ صفر ۱۴۴۸
د افغاني سرې میاشتې له لوري د پکتیا ولایت د ځاځي آریوب ولسوالۍ د ګل غونډۍ په کلي کې د درې میلیونه افغانیو په ارزښت د کار په بدل کې د نغدو پیسو پروژه پیل شوه.
د دې پروژې له لارې به ۸۴ تنه مسلکي او غیر مسلکي کاریګر د یوې میاشتې لپاره پر دندو وګومارل شي.
د پروژې له مخې، هر مسلکي کاریګر ته ورځنی مزد ۸۰۰ افغانۍ او هر غیر مسلکي کاریګر ته ۵۰۰ افغانۍ ورکول کېږي.
کاریګر به د پروژې په موده کې د اوبو د ویالې د جوړولو چارې ترسره کړي، چې په بشپړېدو سره به یې د سیمې د اوبو لګولو وضعیت ښه او د کرنیزو ځمکو د خړوبولو اسانتیاوې زیاتې شي.
دغه پروژه د سره صلیب نړیوالې کمېټې په مالي ملاتړ پلي کېږي او موخه یې د کارموندنې له لارې د اړمنو کورنیو ملاتړ او د سیمې د خلکو د معیشت ښه کول دي.
