د ځان بسياينې پر لور؛ هرات کې ۱۵۰ بې سرپرسته مېرمنو ته حرفوي زده کړې ورکول کېږي
شنبه، ۲ ذوالقعده ۱۴۴۷
د افغاني سرې میاشتې د لوېدیځ زون د مرستون آمریت له لوري په هرات ولایت کې ۱۵۰ بېسرپرسته مېرمنو ته د حرفوي زدهکړو پروګرامونه روان دي، چې موخه یې د هغوی اقتصادي پیاوړتیا او د خپلواک ژوند لپاره د زمینې برابرول دي.
یادو مېرمنو تر دې دمه د درې نیمو میاشتو لپاره په بېلابېلو حرفوي برخو کې عملي او نظري زده کړې ترلاسه کړې دي، چې په کې خیاطي، افغاني ګنډنه، شیریني پزي، د نباتي محصولاتو تولید، د وچو مېوو او زعفرانو بسته بندي شامل دي.
دغه روزنیز پروګرامونه د دې لپاره پلي کېږي، څو ګډونوالې وکولای شي له زده کړل شويو مهارتونو څخه په استفادې سره کوچني کاروبارونه پیل کړي، د عاید سرچینې ومومي او پر دوامداره مرستو خپله تکیه کمه کړي.
افغاني سره میاشت د پروګرام د اسانتیاوو په چوکاټ کې، د حرفوي زده کړو ترڅنګ، د تګ راتګ کرایه هم ورکوي. تېره ورځ د پاتې ۱۳ ورځو کرایه ۳۸۳,۵۰۰ افغانۍ ووېشل شوه؛ له دې جملې ۲۹۲,۵۰۰ افغانۍ زدهکوونکو، ۸۳,۲۰۰ افغانۍ ښوونکو او ۷,۸۰۰ افغانۍ د روزنیزو مرکزونو ساتونکو ته ځانګړې شوې وې.
یاد پروګرام د فنلنډ او بریتانیا د سره صلیبونو په مالي ملاتړ عملي کېږي.
