کابل؛ د ملک سلمان د بشري مرستو مرکز افغاني سرې میاشتې ته د روژې په مناسبت ۱۰۰ ټنه خرما وسپارله
چهارشنبه، ۲۳ شعبان ۱۴۴۷
د سعودي عربستان د شاهي هېواد د ملک سلمان د بشري مرستو مرکز د روژې میاشتې په مناسبت، له اړمنو او بېوزلو کورنیو سره د مرستې په موخه افغاني سرې میاشتې ته ۱۰۰ ټنه خرما وسپارله.
د مرستې د سپارلو په مراسمو کې د افغاني سرې میاشتې مرستیال ښاغلي حافظ عزیزالرحمن، په افغانستان کې د سعودي سفارت مرستیال ښاغلي علي محمد الحصان او د ياد مرکز مشر ښاغلي فهاد سعد القحطاني ګډون درلود.
د افغاني سرې میاشتې مرستیال د ورور هېواد سعودي عربستان له دوامدارو مرستو مننه وکړه او زياته يې کړه، چې ياد هېواد تل په سختو شرایطو کې د افغانانو تر څنګ پاتې شوی، او افغان ولس یې یوازې نه دی پرېښی. نوموړي ډاډ ورکړ، چې د افغاني سرې مياشتې سره کېدونکي مرستې په بشپړ شفافيت وېشل کېږي.
ورپسې د سعودي عربستان مرستیال سفیر په خپلو خبرو کې ډاډ وښود، چې هېواد یې په هر ډول حالاتو کې د افغانانو لاسنیوي ته ژمن دی او د بشري مرستو د پراختیا په برخه کې به خپلې هڅې روانې ساتي.
