د افغاني سرې میاشتې ټولنې مرستیال ښاغلي ملا نورالدین ترابي د سرې میاشتې له میدان وردګ څانګې څخه لیدنه وکړه!
د روان ۱۴۰۰ لمریز کال د لړم پر لومړۍ نیټه د افغاني سرې میاشتې ټولنې مرستیال ښاغلي ملا نورالدین ترابي، چې د مرکزي دفتر د بیلابیلو ریاستونو څخه جوړ پلاوي یې ملګري کوله، د میدان وردګ ولایت له سرې میاشتې څخه لیدنه وکړه.
په یاده لیدنه کې د افغاني سرې میاشتې ټولنې مرستیال ښاغلي ملانورالدین ترابي د یادې څانګې له کارکوونکو سره د شته ستونزو او اړتیاوو په اړه ناسته ترسره او له بیلابیلو برخو څخه یې لیدنه وکړه.
ښاغلي ترابي وویل: د طبیعي او غیر طبیعي پیښځپلو د غوره لاسنیوي په موخه باید د ملي ټولنې ټولې څانګې او پروګرامونه منظم او په ښو امکاناتو سمبال اوسي او په خپلو ورځنیو بشرپاله کړنو کې د سره صلیب او سرې میاشتې د نړیوال غورځنګ اصولو ته ځانګړې پاملرنه وکړي؛ ترڅو وکولای شو خپلې چارې په بشپړې ځواکمنتیا سره سرته ورسوو.
