د افغاني سرې میاشتې له لورې په مرکزي ریاست کې د رضاکارانو د ستاينې او هڅونې په موخه نړیواله ورځ ولمانځل شوه!
رضاکاران د افغاني سرې میاشتې لپاره حیاتي ارزښت لري، په همدې تړاو د روان ۱۴۴۴ سپوږمیز کال د جمادی الاولی په ۱۲مه د افغاني سرې میاشتې له لورې په مرکزي ریاست کې د رضاکارانو د ستاينې او هڅونې په موخه نړیواله ورځ ولمانځل شوه. په یاده غونډه کې د افغاني سرې میاشتې سرپرست عمومي رئیس ښاغلي مولوي مطیع الحق "خالص"، د یادې ټولنې مرستیال ښاغلي الحاج مولوي نورالدین "ترابي"، د نړیوال فدراسیون استازي ښاغلي رعد الحدید، د سور صليب استاﺯى او د مختلفو ریاستونو رئیسانو ګډون درلود. د غونډې په پیل کې د افغاني سرې میاشتې عمومي رئیس ښاغلي مولوي مطیع الحق "خالص" ګډونوالو ته د ښه راغلاست ترڅنګ د رضاکارانه کړنو او رضاکارانو په ارزښت وغږید؛ چې دا يوه دينې، انساني او اخلاقي وجيبه ده، زیاته یې کړه "سره میاشت په حقیقت کې د رضاکارانو ټولنه ده. او په رضاکارانه کړنو ولاړه ده، ځکه خو دولتي ارګان هم نه ګڼل کیږي". نوموړي وویل " رضاکاران ددی ټولنې اساس او د ملا د تیر حیثیت لري، همداراز رضاکاران ددې ټولنې ژبه، سترګی او غوږونه دي. دوى په ټولنه کې مونږ ته اړمن وګړي راپیژنی، دوى د ولس ستونزې اوري او د ټولنې ترجمانی کوي، رضاکاران د ملی ټولنو لاس او پښې دي، د پيښې ته رسيدنه او ځواب وينه کې ددوى شتون اړين دى. سور واسکټ د صداقت او خدمت نښه ده ". نوموړي له رضاکارانو وغوښتل چې د الله تعالى رضا په نظر کی ونیسي او ددی ټولنې ريښتيني خدمتګار و اوسي".
همدا راز نوموړي وويل:" دا مهال موږ په هيواد کې ۲۴۰۰۰ تثبیت شوي رضاکاران لرو خو دا زموږ ستونزو او پيښو ته بسنه نه کوي، ځکه دا مهال په ټول افغانستان کې ۵۴ زره قريي دي او مونږ هوډ لرو چې په هر کلې کې دوه رضاکاره ولرو ځکه چې کلیو کی د اړمنو وګړو غږ اوریدل د رضاکارانو په مټ شونى دى".
ورپسې د نړیوال فدراسیون استازي ښاغلي رعد الحدید د غونډې ګډونوالو او رضاکارانو ته د ښه راغلاست تر څنګ وویل " رضاکارانه کړنې زموږ په دین او کلتور کی ځای او اصل لري". نوموړي زیاته کړه "د یو مسلمان په حیث موږ دا دنده لرو چی خپل ديني عالي اخلاق او اصول نورو سره شریک کړو. مونږ لپاره نړیوال بشری قانون ۱۴۰۰ کاله مخکی راغلی". نوموړي له رضاکارانو وغوښتل " چې تاسې باید خپل دیني ارزښتونه خلکو ته ورسوۍ". یاده غونډه د افغاني سرې مياشتې سرپرست عمومي رئيس په لاس رضاکارانو ته د (برګ سبز تحفه درویش) ډالیو په ورکړې پای ته ورسیده.
