کابل کې د افغاني سرې میاشتې ټولنې له لوري ۲۰۰ کورنیو ته مرسته ووېشل شوه!
نن دوشنبه د روان ۱۴۰۱ لمریزکال د وري میاشتې پر ۲۹ مه نېټه، چې د ۱۴۴۳ کال د رمضان المبارک میاشتې له ۱۷ مې نېټې سره سمون لري، د تېرې ورځې د مرستې پر دوام د کابل ولایت نماینده ګۍ کې د افغاني سرې میاشتې ټولنې له لوري ۲۰۰ اړمنو او بېوزله کورنیو ته د آلمان د سولې کلي له لوري چمتو شوې د خوراکي توکو مرسته، چې هرې کورنۍ ته پکې ۵۰ کیلو اوړه، ۲۴.۵ کیلو وریژې، ۷ کیلو لوبیا، ۲ کیلو مالګه، ۷ کیلو نخود، ۷ کیلو مټر دال، ۱۰ لیټره غوړي او ۵ کیلو بوره شامل و، ووېشل شول.
د یادونې وړ ده، چې دا لړۍ د وري میاشتې پر ۲۵ مه نېټه د ۸۰۰ اړمنو او بېوزله کورنیو لپاره پیل شوې وه، نن دوشنبه پاتې ۲۰۰ کورنیو ته د مرستې په وېشلو سره پایته ورسېده. همداراز په پام کې ده چې په نږدې راتلونکي کې یاده مرسته د بګرامیو ولسوالۍ په ۱۳۰ او د سروبي ولسوالۍ په ۳۷۰ اړمنو کورنیو وویشل شي.
