کابل؛ د متوسطې خوار ځواکۍ د څلور میاشتني پروګرام د پلي کېدو په موخه له ۱۱ مؤسسو سره د همکارۍ هوکړه لیکونه لاسلیک شول
سهشنبه، ۲ ربیع الآخر ۱۴۴۸
د افغاني سرې میاشتې په استازیتوب د دې ادارې د سکرتر جنرال عملیاتي مرستیال ښاغلي مولوي روح الله عبدالسلام او د ۱۱ مؤسسو د استازو ترمنځ د متوسطې خوار ځواکۍ د څلور میاشتني پروګرام د پلي کېدو په موخه د همکاریو هوکړه لیکونه لاسلیک شول.
ددې هوکړه لیکونو له مخې به یادې مؤسسې د هېواد په ۱۱ ولایتونو؛ کابل، لوګر، میدان وردګ، غزني، خوست، پکتیا، پکتیکا، بامیان، دایکندي، کاپیسا او پنجشېر کې د افغاني سرې میاشتې اړوند په ۳۲ بنسټیزو او فرعي روغتیايي مرکزونو کې د متوسطې خوار ځواکۍ د څلور میاشتني پروګرام په پلي کېدو کې همکاري وکړي.
ددې پروګرام د پلي کېدو برخه کې (MOVE, HNTPO, CAF, SAF, OCED , OPHCD, AKHS, AADA, ATOA, YAAR, BARAN) موسسې شاملې دي.
د هوکړه لیکونو د لاسلیک پر مهال د افغاني سرې میاشتې د سکرتر جنرال عملیاتي مرستیال وویل، د دې ادارې اساسي موخه د بشري خدمتونو په چوکاټ کې له بېوزلو، اړمنو او زیانمنو کورنیو سره مرسته او د هغوی اړتیاوو ته پر وخت رسېدنه ده.
نوموړي د دغو هوکړه لیکونو لاسلیک د اړمنو کورنیو د درد او کړاو د راکمولو په برخه کې مهم ګام وباله او هیله یې څرګنده کړه چې د یادو همکاریو له لارې به له ستونزو سره د مخ کورنیو اړتیاوو ته په اغېزمن ډول ځواب وویل شي.
دا پروګرام به د یادو ولایتونو په ۳۲ بنسټیزو او فرعي روغتیايي مرکزونو کې د افغاني سرې میاشتې له لارې پلي شي او د خوار ځواکۍ له ستونزې سره مخ ماشومانو او اړمنو کورنیو ته به اړین خدمتونه وړاندې کړي.
افغاني سره میاشت تل هڅه کوي، څو د خوار ځواکۍ له ستونزې سره مخ ماشومانو او اړمنو کورنیو ته د روغتیايي او تغذیوي خدمتونو د رسېدو زمینه پراخه او د دې ستونزې له امله رامنځته کېدونکي زیانونه راکم کړي.
