کابل؛ د روغتیايي معلوماتو سیستم د پیاوړتیا شپږ ورځنی ورکشاپ پیل شو
شنبه، ۲۴ شوال ۱۴۴۷
د افغاني سرې میاشتې په مرکزي دفتر کې د دې ادارې ۳۰ تنو مرکزي او ولایتي روغتیايي کارکوونکو ته د روغتیايي معلوماتو د اداري سیستم د پیاوړتیا په موخه شپږ ورځنی ښوونیز ورکشاپ پیل شو.
دغه ورکشاپ په افغانستان کې د سره صلیب نړیوالې کمېټې (ICRC) په مالي ملاتړ ترسره کېږي.
د ورکشاپ پرانیست غونډه کې د افغاني سرې میاشتې د سکرتر جنرال عملیاتي مرستیال، ښاغلي مولوي روح الله عبدالسلام، ګډونوالو ته ښه راغلاست ووایه او دا ډول روزنیز پروګرامونه یې د روغتیايي سکتور د پیاوړتیا لپاره مهم وبلل.
نوموړي له ګډونوالو وغوښتل؛ څو له دې فرصت څخه پوره ګټه واخلي، د روغتیايي معلوماتو د سیستم د ښه والي لپاره عملي هڅې وکړي او ترلاسه شوې زده کړې په خپلو ورځنیو چارو کې وکاروي.
په دې ورکشاپ کې به ګډونوالو ته د روغتیايي معلوماتو د راټولولو او راپور ورکولو، د معلوماتو د کیفیت د ښه والي، د راپورونو د تحلیل او د DHIS2 سیسټم د معیاري کارونې په اړه لازم معلومات ورکړل شي.
