پکتیکا؛ ۴۰۰ داخلي بېځایه شویو کورنیو ته د ۴.۲ میلیونه افغانیو نغدي مرستې د وېش لړۍ پیل شوه
دوشنبه، ١ ذو الحجه ۱۴۴۷
د افغاني سرې میاشتې له لوري د پکتیکا ولایت، د سروبي او ارګون ولسوالیو ۴۰۰ داخلي بېځایه شویو کورنیو ته د ۴.۲ میلیونه افغانیو نغدي مرستې د وېش لړۍ پیل شوه.
د مرستې د وېش پر مهال، د افغاني سرې میاشتې د سویل ختیځ زون رئیس مولوي سید منهاج الدین هاشمي وویل: افغاني سره میاشت د جګړو له امله د بېځایه شویو کورنیو ملاتړ ته ځانګړې پاملرنه کوي او تر دې مهاله یې په پکتیکا، پکتیا او خوست ولایتونو کې له ۱۰۷۰۰ کورنیو سره نږدې ۱۵۰ میلیونه افغانۍ نغدي مرسته کړې او ۱۰۰ نورو کورنیو ته یې خېمې او د کور وسایل وېشلي دي.
همدا راز، د پکتیکا د ولایتي څانګې رئیس مولوي عارف الله حامد وویل، چې نن ورځ د سروبي او ارګون ولسوالیو ۴۰۰ بېځایه شویو کورنیو ته د ډنمارک سره صلیب په مالي ملاتړ ۴.۲ میلیونه افغانۍ وېشل کېږي، چې هره کورنۍ به ۱۰۵۰۰ افغانۍ ترلاسه کړي.
نوموړي زیاته کړه، چې د افغاني سرې میاشتې له لوري په پکتیکا کې ۲۹۰۰ داخلي بېځایه شویو کورنیو سره ۴.۸ میلیونه افغانۍ نغدي مرسته شوې او په نږدې راتلونکي کې به په برمل او تروو ولسوالیو کې ۵۰۰ کورنیو ته د نغدي مرستې ترڅنګ ۱۰۰ کورنیو ته خېمې هم ووېشل شي.
افغاني سره میاشت د پېښو او ناورینونو له امله د زیانمنو او بېځایه شویو کورنیو لاسنیوی خپل بشري مسؤولیت ګڼي او هڅه کوي د بېړنیو مرستو له لارې د هغوی لومړنۍ اړتیاوې پوره کړي.
