لمریزې بریښنا د کندهار مرستون روښانه کړ !
دوشنبه د روان ۱۴۰۱لمریزکال د وري پر ۲۲ مه، چې د ۱۴۴۳ سپوږمییزکال د رمضان المبارک میاشتې له ۱۰ مې نېټې سره سمون خوري د افغاني سرې میاشتې د سویل لویدیځ زون اړوند د کندهار ولایت مرستون کې د لمریزې برېښنا پروژه، چې په یو ساعت کې د ۴۵ کیلو واټه برېښنا د تولید ظرفیت لري د (۴۸۸۳۷۶۰) د څلور ملیونه اته سوه درې اتیا زره اوه سوه شپېته افغانیو په لګښت، چې د پارساه مؤسسې په مالي لګښت او د الکوزیا شرکت په تخنیکي مرسته د مرستون اړوند د مشمولینو کورنیو ته چمتو شوې؛ ګټې اخیستنې ته وسپارل شوه.
د پرانیستې په مراسمو کې د سویل لویدیځ زون رییس ښاغلي اخترمحمد خادم، د پارساه مؤسسې استازي ښاغلي ډاکټرشریف الله حیات، د الکوزیا شرکت رییس ښاغلي شیراحمد دوست د افغاني سرې میاشتې د مرستونونو رییس ښاغلي مغفور الله شهید زوی او د کندهار مرستون اړوندو مسوولینو ګډون کړی و.
ښاغلي اخترمحمد خادم د سرې میاشتې د رهبرۍ په نماینده ګۍ د یادې پروژې له ملاتړ کوونکو مننه وکړه او یاده پروژه یې د مشمولینو لپاره ډېره ګټوره و بلله او زیاته یې کړه، د یادې برېښنا پر مټ به مرستون له ۲۴ ساعته برېښنا برخمن شي.
د یادونې وړ ده، چې یاده مؤسسه له تیرو ۲۷ کالو را پدېخوا په افغانستان کې د ښوونې او زده کړو په برخه کې فعالیت کوي، چې ترڅنګ یې د افغاني سرې میاشتې ټولنې د پېنځه مرستونونو لپاره د لمریزې برېښنا چمتوکولو ژمنه هم کړې.
