سرپرست عمومي رئیس په افغانستان کې د قطر سرې میاشتې له مسٸول او مل پلاوي سره وکتل!
سرپرست عمومي رئیس په افغانستان کې د قطر سرې میاشتې له مسٸول او مل پلاوي سره وکتل!
د افغاني سرې میاشتې سرپرست عمومي رئیس ښاغلي شيخ الحديث شهاب الدین دلاور په خپل کاري دفتر کې په افغانستان کې د قطر سرې میاشتې له مسٸول ښاغلي حسین احمد بوتاني او مل پلاوي سره د دې خیریه ملي ټولنې له بشرپالو مرستو د ملاتړ او ګډو فعاليتونو کې د همغږۍ په موخه نن چهارشنبه د شوال میاشتې پر ۱۸مه، ناسته وکړه.
ناسته کې سرپرست عمومي رئیس په افغانستان کې د قطر سرې میاشتې له تېرو مرستو مننه وکړه او د راستنېدونکو کډوالو د اړتیاوو او ستونزو په برخه کې یې هغوی سره معلومات شریک کړل.
دا راز ښاغلي دلاور کډوالو کورنیو ته د افغاني سرې میاشتې له لوري په ترسره کېدونکو خدماتو کې د قطر او نورو ملي ټولنو مرستې مهمې وبللې او دې برخه کې يې د بېړنیو مرستو برابرولو غوښتنه وکړه.
ورپسې په افغانستان کې د قطر سرې میاشتې مسٸول او مل پلاوي د افغاني سرې میاشتې د بشري خدماتو ستاینه وکړه او ژمنه یې وکړه، چې د راستنېدونکو کډوالو په لاسنیوي او ملاتړ کې به افغاني سره میاشت یواځې نه پرېږدي او له دې خیریه ملي ټولنې سره به خپلې مرستې پراخې کړي.
