سرپرست عمومي رئیس په افغانستان کې د نړیوال فدراسیون له مسئول سره وکتل!
سرپرست عمومي رئیس په افغانستان کې د نړیوال فدراسیون له مسئول سره وکتل!
د افغاني سرې میاشتې سرپرست عمومي رئیس ښاغلي شیخ الحدیث شهابالدین دلاور نن پنجشنبه د ذوالقعدې میاشتې پر ۳ مه، د دې خیریه ملي ټولنې په مرکزي دفتر کې په افغانستان کې د نړیوال فدراسیون له سرپرست مسئول ښاغلي احمد سلیمان سره د راستنېدونکو کډوالو د ملاتړ او بشري مرستو د جلب په موخه ناسته وکړه.
ناسته کې سرپرست عمومي رئیس د راستنو شویو کډوالو کورنیو د اقتصادي ستونزو او مشکلاتو په هکله تفصیلي معلومات وړاندې کړل او د هغوی د لاسنیوي برخه کې یې د اړینو او بېړنیو مرستو چمتو کولو غوښتنه وکړه.
دا راز ښاغلي دلاور د تورخم او سپين بولدک په لنډمهاله پنډغالو کې راستنو شویو کډوالو کورنيو ته د تشنابونو او نورو اړتیاوو پر برابرولو هم ټینګار وکړ.
ورپسې په افغانستان کې د نړیوال فدراسیون سرپرست مسؤل د راستنېدونکو کورنيو د ملاتړ لپاره تر راتلونکو ۲ کلنو پورې د ۲۰ میلیونه امریکايي ډالرو د مرستې برابرولو ترڅنګ د بې سرپرسته مېرمنو د ځان بسياينې په موخه د لازمو مرستو د چمتو کولو ډاډ وړاندې کړ او د مرستو د پراختیا ژمنه یې وکړه.
