د افغاني سرې میاشتې ټولنې سرپرست رییس په کابل کې د سور صلیب له استازي سره وکتل!
نن سه شنبه د روان ۱۴۰۱ لمریزکال، چې د ۱۴۴۳ کال د رمضان المبارک میاشتې له ۱۱ مې سره سمون لري د افغاني سرې میاشتې ټولنې سرپرست عمومي رییس ښاغلي مولوي مطیع الحق خالص د سره صلیب د کوپرېشن له مسوولې مېرمن را برتو سره په خپل کاري دفتر کې لیدنه ترسره کړه.
په دې لیدنه کې د کوپرېشن مسوولې را برتو له افغاني سرې میاشتې ټولنې سره د سره صلیب د فعالیتونو او کړنو په اړه مالومات وړاندې کړل او همدارنګه یې د څلورو نویو پروژو، چې د ماین پاکۍ، د څښلو لپاره د پاکو اوبو، د اقتصادي ارزښت د تأمین او په خوارځواکۍ د اخته ماشومانو د خوارک پروژه، چې له افغاني سرې میاشتې سره به په ګډه پیل شي خبرې وکړې.
په مقابل کې د افغاني سرې میاشتې ټولنې د سرپرست رییس له لوري د مننې تر څنګ د هر ډول ملاتړ او مرستو ډاډ ورکړل شو او زیاته یې کړه؛ تېرې ۴۳ کلنې جګړې په هېواد کې بوږنوونکې پېښې رامنځ ته کړي، چې له امله افغان دې ډول پروژو ته ډېره اړتیا لرې او افغاني سره میاشت به په دې برخه کې له سور صلیب سره غوره مرسته ترسره کړي.
