د افغاني سرې میاشتې ټولنې د ښوونځي زنګ ووهل شو!
نن چهارشنبه د روان ۱۴۰۱ لمریزکال د وری (حمل) میاشتې پر ۳ مه نېټه د افغانې سرې میاشتې ټولنې د ښوونځي د پرانیستې په موخه یوه غونډه جوړه شوې وه، چې د افغاني سرې میاشتې ټولنې د تفتیش رییس ښاغلي مولوي محمد نسیم احمدي، د بشري سرچینو رییس ښاغلي نورالحق یوسفي، د اطلاعاتو او خپرونو رییس ښاغلي عرفان الله شرفزوی، د ترکیې هېواد د سرې میاشتې استازو، د ښوونځي مدیر، استاذانو او زده کوونکو په کې ګډون درلود.
د افغاني سرې میاشتې ټولنې د ښوونځي مدیر ښاغلي مولوی عبدالله حلیم د غونډې ګډونوالوته د ښه راغلاست ترڅنګ وویل، مونږ عقیده لرو، چې دغوره اخلاقو او ژوند کولو کړنلاره له قرآن کریم څخه تر لاسه کېږي د علم خاوندان د الله په نزد لوړ مقام لري، کوم زده کوونکی چې د علم د زده کړې په موخه له کوره بهر ښوونیزو مرکزونو ته روانېږي داسې مثال لري لکه د الله جل جلاله په لاره کې جهاد. ورپسې په کابل د ترکیې هېواد د سرې میاشتې استازي په خپلو خبرو کې وویل، د خپل هېواد د خلکو او سرې میاشتې په استازیتوب غواړم تاسوته ووایم، چې مونږ په افغانستان کې د ښووځیو د پرانستلو هرکلی کوو او نه مې غوښتل دافغاني سرې میاشتې ټولنې د لیسې د زده کوونکو هرکلی په تش لاس وکړم نو مناسبه مې وګڼله ترڅو ۴۰۰ بیکې، چې په هغو کې قلمونه، پنسلونه، پنسل تراش، پنسل پاک، رنګې او بیسکېټ شامل دي زده کوونکو ته ډالۍ کړم. دا زمونږ اولینۍ او وروستۍ مرسته نه ده او نه به وي غواړو ورته مرستو ته دوام ورکړو.
همدارنګه د افغاني سرې میاشتې ټولنې حقوقي سلاکار ښاغلي لطیف الله قمري د غونډې ګډونوالو ته د علم د فضیلت په اړه هر اړخیزه وینا وکړه. ورپسې د ساتنې او څارنې آمر ښاغلي مولوي عبدالکبیر زده کوونکو ته د ښوونځیو د پیل مبارکي ورکړه او د علم پر ګټویې زده کوونکو ته هر اړخیز معلومات وړاندې کړل.
د غونډې په پای کې د افغاني سرې میاشتې د تفتیش رییس ښاغلي مولوي محمدنسیم احمدي وویل د حلال او حرام پېژندل په علم سره کېږي، علم هغه رڼا ده چې الله تعالی وغواړي د هغې په واسطه د انسان سینه ښایسته کوي، عالم هغه چا ته ویل کېږي چې کبر، غرور ونه لري او هېڅوک سپک و نه کڼي. غونډه د دعایې په ویلو پایته ورسېده.
