د افغاني سرې میاشتې له لورې المان هېواد ته د ماتو هډوکو او سختو سوځیدلو ماشومانو ۸۷مه جوپه لېږل کېږي!
د ربیع الثاني په ۱۴مه په هغه غونډه کې چې د افغاني سرې میاشتې د غونډو په تالار کې جوړه شوې وه د افغاني سرې میاشتې د سرپرست عمومي رئیس ښاغلي مولوي مطیع الحق خالص له لوري ۵۴ هغه تنکي ماشومان چې عمرونه یې له ۱ څخه تر ۱۱ کلونو پورې وو؛ د درملنې په موخه د المان سولې کلي خیریه بنسټ ته ور وپېژندل شول. یاد ناروغان هغه ماشومان دي، چې هډوکي یې مات دي او یا په اور سخت سوځېدلي او په هېواد کې دننه یې لازمه درملنه نشوه کیدای. په یاده غونډه کې د افغاني سرې میاشتې عمومي رئیس ښاغلي مولوي مطیع الحق خالص وویل "د افغاني سرې میاشتې بنسټیزه موخه د بېوزله او د پېښځپلو هېوادوالو لاسنیوی دی، چې په همدې موخه د روغتیا په برخه کې پراخ خدمات ترسره کوي". نوموړي وویل "د المان سولې کلي خیریه بنسټ له ۱۹۸۸ کال راهیسې له افغاني سرې میاشتې سره په ګډه د هغو ماشومانو د درملنې په برخه کې کار کوي، چې هډوکي یې مات وي او په اور سخت سوځېدلي وي". د ښاغلي مولوي مطیع الحق خالص پر وینا "د افغاني سرې میاشتې له لوري په یادو ناروغیو اخته ماشومان هر کال دوه ځل المان ته استول کېږي، چې درملنه یې وړیا ترسره کېږي او شپږ میاشتې وروسته بېرته هېواد ته راګرځي". نوموړي وویل "تر اوسه د افغاني سرې میاشتې له لوري المان ته د درملنې لپاره څه باندې ۴۷۰۰ ماشومان لېږل شوي، چې په ۸۷مه جوپه کې دا ځل ۵۴ لېږل کېږي او ۶۸ هغه ماشومان چې شپږ میاشتې وړاندې د افغاني سرې میاشتې له لوري المان ته استول شوي وو؛دوه ورځې وروسته د لړم په ۱۹مه د درملنې د بهیر له بشپړولو وروسته هېواد ته راستنېږي".
په پای کې ښاغلي خالص په ټولو نړیوالو او ملي خیریه ټولنو غږ وکړ، چې د ماشومانو د تداوۍ په برخه کې له افغاني سرې میاشتې سره همکار واوسي.
