د افغاني سرې میاشتې سرپرست مرستیال محترم ملا نورالدین ترابي د لوژستیک، نړیوالو اړیکو، روغتیا او مالي له رییسانو سره ګډه ناسته ترسره کړه!
د افغاني سرې میاشتې سرپرست مرستیال ملا نورالدین ترابي د افغاني سرې میاشتې د لوژستیک او تدارکاتو له رییس محمد عارف هدایت، د روغتیایي خدمتونو له رییس محمد سلیم بهرمند، د مالي چارو له رییس شبیر احمد عثماني، د نړیوالو اړیکو له سرپرست مرادي، د روغتیایي ګودامونو له مسوول فهیم اغا او د فارمسست خدمتونو له مسوول مصطفی سره د هېواد لرې پرتو سیمو کې د افغاني سرې میاشتې روغتیايي مرکزونو ته د درملو د ژر او کافي رسېدو په موخه ګډه ناسته ترسره کړه.
په یاده ناسته کې پرېکړه وشوه، چې د نړیوالو اړیکو ریاست به په هوایي ډګرونو کې د درملو د ځنډني کيدو پر وړاندې پراته خنډونه هواروي او د لوژستیک ریاست به د کال په لومړۍ (حمل)، پینځمه (اسد) او نهمه (قوس) میاشت کې د افغاني سرې میاشتې ټولو روغتیایي مرکزونو ته درمل رسوي او مخې ته پراته خنډونه به يې د افغاني سرې میاشتې د عمومي ریاست له لوري حل کېږي. همدا ډول پرېکړه وشوه، چې د درملو د انتقال لپاره به مالي ریاست ته له وړاندې لګښتونه چمتو کېږي.
په دې ناسته کې د روغتیايي خدمتونو د ښه ترسره کیدو په موخه پرېکړه وشوه، چې د ولایتونو د ډاکترانو او روغتیایي مسوولینو د ارزونې په موخه به په ولایتونو کې روغتیایي مسوولین او ډاکتران مرکز ته راغوښتل کېږي او د کمیټې له لوري به یې د وړتیا ارزونه کېږي؛ ترڅو په دې ډول افغاني سره میاشت وکولی شي په ښه او غوره توګه هېوادوالو ته روغتیایي خدمتونه ترسره کړي او هغه روغتیایي خدمت کوونکي لرې کړي، چې په روغتیایي خدمت کې د ښه خدمت وړتیا او پوهه نه لري.
همدا ډول په دې ناسته کې پرېکړه وشوه، چې د افغاني سرې میاشتې په روغتیایي مرکزونو کې دې د درملو د سمې، شفافې او دقیقې توزیع لپاره اقدامات وشي؛ ترڅو روغتیایي مرکزونو ته لېږل شوي درمل اړمنو ناروغانو ته ورسېږي. په دې ناسته کې د لوژستیک ریاست ته سپارښتنه وشوه، چې دوی ته سپارل شوي درمل دې په ګودامونو کې نه ځنډول کېږي او له مرسته اخیستونکو څخه دې هغه درمل نه اخیستل کېږي، چې وخت یې کم پاتې وي.
