د افغاني سرې میاشتې سرپرست عمومي رییس مولوي مطیع الحق خالص د لوړپوړي پلاوي په مشرۍ قطر ته لاړ!
د افغاني سرې میاشتې سرپرست عمومي رییس محترم مولوي مطیع الحق خالص نن د روان ۱۴۰۰ لمریز کال د کب پر دویمه نېټه د یو لوړ پوړي پلاوي په مشرۍ قطر هېواد ته په اوه ورځني سفر لاړ. ټاکل شوې د افغاني سرې میاشتې سرپرست عمومي رییس به په خپل سفر کې د نړیوال فدراسیون له مشرانو، د قطر هېواد د سرې میاشتې له مسوولینو او د ګڼو نورو خیریه ټولنو له مسوولینو سره له افغانستان سره د بشري مرستو په اړه خبرې وکړي.
تمه ده چې د افغاني سرې میاشتې سرپرست عمومي رییس به په دې سفر کې د بشري مرستو ګڼې لاس ته راوړنې ولري. په یاد پلاوي کې د افغاني سرې میاشتې سکرتر جنرال ډاکتر محمد نبي برهان، د نړیوالو اړیکو رییس غلام حبیب حسام او د عربي هېوادونو لپاره سلاکار قاري انعام الله قاضي زاده ګډون لري.
