د افغاني سرې میاشتې سرپرست عمومي رئیس د اسلامي پيوستون د صندوق له اجرایوي رئیس سره په سعودي عربستان کې لیدنه ترسره کړه!
د افغاني سرې میاشتې سرپرست عمومي رئیس ښاغلي مولوي مطیع الحق خالص د اسلامي همکاريو د سازمان د اسلامي پيوستون د صندوق له اجرایوي رئیس ښاغلي ابراهيم بن عبدالله الخزیم سره په سعودي عربستان کې لیدنه ترسره کړه. ناسته کې ښاغلي الخزیم وویل دوی به هڅه وکړي په افغانستان کې د بشري خدماتو لپاره چې کومه بودیجه لري په ښه توګه مصرف کړي. نوموړي وویل په پام کې لري د څو ادارو د استازو په ملتیا له افغانستانه لیدنه وکړي او په افغانستان کې شته وضعیت او اړتیاوې له نېږدې وګوري. ښاغلي الخزیم په اسلامي پرمختیایي بانک کې د افغانستان په نوم د شته پیسو د تعقیب هیله وښوده. نوموړي ژمنه وکړه، چې دوی به د افغاني سرې میاشتې په نوم د مرستو د جلب او ساتنې مستقل فایل جوړ کړي ترڅو وکړای شي له افغاني سرې میاشتې سره دوامدارې مرستې وکړي. ښاغلي الخزیم د سوري زړه په ناروغۍ د اخته ماشومانو د درملنې په برخه کې د ځانګړي روغتون د تجهیز په اړه د افغاني سرې میاشتې د سرپرست عمومي رئیس د همکارۍ د غوښتنې په اړه ژمنه وکړه، چې لازمه همکاري به وکړي.
