د افغاني سرې میاشتې سرپرست رییس د ترکيې هېواد د دیانت وقف خیریه بنسټ او اوقافو څانګې له مسوولینو سره وکتل!
پنجشنبه د روان ۱۴۰۱ لمریزکال د وري پر ۲۵ مه نېټه د افغاني سرې میاشتې ټولنې سرپرست رییس ښاغلي مولوي مطیع الحق خالص د ترکیې هېواد د دیانت وقف خیریه بنسټ له رییس ښاغلي احسان اجیق او د ترکیې هېواد اوقافو څانګې له مسوولینو سره لیدنه ترسره کړه.
په دې لیدنه کې د افغاني سرې میاشتې سرپرست رییس د افغاني سرې میاشتې د فعالیتونو او شته ستونزو په اړه مالومات وړاندې کړل.
په مقابل کې ښاغلي احسان الله اجیق د افغاني سرې میاشتې پلاوي ته د ښه راغلاست تر څنګ له افغانانو سره د ترکیې هېواد د غوره اړیکو یادونه وکړه، همدارنګه نوموړي د دیانت وقف خیریه بنسټ لوري د افغاني سرې میاشتې رییس ته د هر اړخیزې مرستې ډاډ ورکړ او ژمنه یې وکړه، چې په لومړي قدم کې به یو ګرځند روغتیایي ټیم په ټولو وسایلو سمبال چمتو کوي. همدارنګه یې په سوري زړه د اخته ناروغانو د درملنې ژمنه هم وکړه.
د یادونې وړ ده، چې د دیانت وقف خیریه بنسټ د نړۍ په ۱۴۹ هېوادونو کې بشرپالې کړنې ترسره کوي په ځانګړې توګه د ښوونځیو، مسجدونو، د څښاک اوبو رسولو، د ژورو څاګانو کیندلو او نور، چې په افغانستان کې هم د یتیمانو او ژورو څاګانو د کیندلو په برخه کې فعالیت ترسره کوي.
په دې لیدنه کې د افغاني سرې میاشتې سربرست رییس، ورسره مل پلاوي، د ترکیې هېواد د سرې میاشتې اجرائیوي رییس او د ترکیې د سرې میاشتې لوړرتبه کارکوونکو شتون درلود.
